خبطة نيوز
مقالات مشابهة
صبري محمد علي (العيكورة) يكتب:
طريق الدندر أبو رخم حتى لا تغلطوا كما الإنقاذ !
يقول الخبر المتداول اليوم بحسب (صوت السودان) أن السيد رئيس مجلس السيادة وجه بإكمال طريق الدندر أبو رخم خلال ثلاثين يوماً فقط .
وكشفت مصادر أنه تم التعاقد مع (١٣) شركة جاء ذلك لدى لقاء والي سنار بالفريق البرهان اليوم ببورتسودان
وأشار الخبر الى تصريحات سابقة لوزير الطرق والجسور الاتحادي أبان فيه أن طول الطريق (١١٠) كيلومتر
وأن تعدد الشركات قصد منه أن تكون لكل شركة مسافة معلومة ! و وعد بتنفيذ الطريق قبل هطول الأمطار .
كان هذا فحوى الخبر …
طيب (جيتوني في محلي)
دعونا نفترض أن التصاميم جاهزة ودراسات التربة وتصاميم الاسفلت والخرسانة كلها عال العال .
والتموين متوفر وعلى داير المليم
ولو تجاهلنا أي إختلافات طبوغرافية وقمنا بتوزيع الطول (١١٠) على ال (١٣) شركة فسيكون نصيب الواحده في حدود الثمانية كيلومتر (وشوية)
وأمام كل شركة (٣٠) يوم ياخي قول ٩٠ يوم قووول (٦) شهور
الكلام ده فنياً (ما بيدخل) العقل !
يا مهندسين الشركات خليكم واقعيين
أحسبوا إنتاج المعدة والإختبارات وحساب الظروف القاهرة
يا باشمهندس …
عندك فحوصات دمك التربة ال (compaction) بيس عاوزة ليها ١٨ ساعة في الفرن عشان تقدر تحسب إذا كانت الطبقة دي ناجحة واللاّ راسبة
ياهندسة ….
عشان تتأكد من خرسانتك ناجحة واللا راسبة لازم تتغمر في الموية (٢٨) يوم حتى تكسرها وتعرف ال (strength) بتاعها ظابط واللاّ لا
ياهندسة (أجعص) فرادة أسفلت لايمكن أن تفرد أكثر من ٣٠٠ متر طولي في اليوم
خليك من إختبارات ضبط الجودة التانية دي كمان كلام تاني
يا سادة يا مهندسين …
السيد البرهان ليس مهندساً فهموه ما تدنقروا روسينكم ساكت شهركم ده لو كفاكم إحلال تربة ساكت كتر خيرو
وكمان أسمعو هنا …..
(عليا النعمة) مش منطقة سنار والقضارف دي !
تربتها من أسوأ أنواع التصنيف الذي يصلح لصناعة الطرق وحسب تصنيف (الآشتو) الامريكية تصنف ك (clay) نوع (A-2-6)
يعني مشكلتها عويصة في حكاية النفاذية والمسامية ودي أي أمطار بتشق الاسفلت ده زي حيطة حبوبتي
والمشكلة دي عشان تحلها عليك تعمل إحلال أقلاه متر الي متر ونص تحفر التربة وتستبدلها بمواد صالحة ودي ما قدامك إلا شرق الجزيرة (التربة الحمراء)
أها تعال شوف لي ال (space value) وشوف القلاب حا يجيب ليك كم رد في اليوم .
حبايبي ما تغشوا المسؤولين ساكت
فهذا الطريق مؤقتاً
من الأفضل أن يتولاه سلاح المهندسين كضرورة حرب بأدنى مواصفات وخلاص
لكن أن يتم التعاقد مع شركات فأعتقد أن الحكاية (حا) تكون (مأكله ساكت)
لكن طريق (ود ناس كده) بمواصفات فنية (البنعرفها دي)
تضمنوا ديمومته
ما حا تقدروا تعملوه في أقل من (٢٤) شهر إن لم تكن (٣٦) شهر
الخميس ٢٥/ أبريل ٢٠٢٤م