الرئيسية / الاعمدة / صبري محمد علي يكتب: المبعوث الأمريكي (تبلها و تشرب مويتها) طوالي

صبري محمد علي يكتب: المبعوث الأمريكي (تبلها و تشرب مويتها) طوالي

صبري محمد علي يكتب: المبعوث الأمريكي (تبلها و تشرب مويتها) طوالي
تداولت مواقع إخبارية عُدة ان المبعوث الأمريكي (مقصوف الرقبة) الخاص بالسودان
(الشيخ) …..
التوم (مش عارف) بيرييلو قال في تصريحات تلفزيونية لم يُحدد الخبر لأي قناة كانت تلك التصريحات
المُهم يا صاحبي الزول ده قال …..
إن إيقاف الحرب في السودان مرهون بوقف التدخلات الخارجية في الشأن السوداني
و إن …..
و (الكلام ما زال للشيخ التوم)
إيقاف الأمارات لدعم المتمردين مرهُون بإيقاف الجيش تلقي مساعدات من روسيا و إيران
وهدد (الشيخ التوم)
بإرسال قوات دولية أفريقية الى السودان إذا رفضت القوات المسلحة التراجع عن شرط (إخلاء) المنازل المدنية والإتفاق مع مليشيا الدعم السريع ! وأشار الى حتمية منبر جدة
تقريباً كان هذا هو فحوى الخبر المُتداول اليوم
أووول حاجة نقول للمستر التوم الكلام ده…
تبلو و تشرب مويتو
وتدي معاك …
بن زايد جُغمتين تلاتة
تاني حاجة ….
ما كان في داعي ترميها على بلاطه كده لأنو الشعب السوداني من أول طلقة كان عارف إنتو ين
والماسك الريمونت منو
مشكلتكم إنتو يا سيد التوم إنكم ما فاهمين حتي الآن إنكم بتتعاموا مع شعب
واقع من السماء سبعة مرات
وإنو (يا سيد اللمنتي ليك)
نحن شعب صبي (الدرداقة) عندنا يمكن أن يستضاف في أعتي القنوات الفضائية ويمنطق العالم و بأي اللغات شئتم
بس
مين يفهمكم أنكم تستهدفون الشعب السوداني معلم الشعوب الثورات والنضال والجهاد والصبر وصاحب العزيمة التي لا تنكسر لمستعمر ولا عميل ولا أرزقية سفارات
(شُفتا كيف) ….!
عزيزي القارئ
بصرخة المبعوث الأمريكي الخاص اليوم
دعني أستبق ما قد يأتي وأهنئكم بالنصر المؤذر قريباً بإذن الله
قول ليّ الكلام ده جبتو من وين يا أستاذ !
(اولاً) توقيت التصريح أو سمِّه الجقلبة أو الجرسة سمه ما شئت متزامناً مع الإنتصارات الباهرة التي يحققها جيشنا الباسل يوماً تلو الآخر هي محاولة أمريكية أماراتية لرفع الروح المعنوية المنهارة للمليشيا
يعني مُمكن تسميها بالبلدي كده
(ما همانا ما دام عريسنا معانا)
أو أمريكا معانا
طيب….
الحديث بلسان الامارات هذه المرة بأنها لن توقف دعمها ما دام السودان (مش عارف) يتلقي مساعدات خارجية يحمل دلالة بان عيال زايد قد (فتروا) والخزينة عدمت القرش الأحمر وان هناك تململ داخل الأسرة الحاكمة على هذه (البعزقة) الحاصلة وما تصريح الشيخ التوم اليوم إلا محاولة لإبقاء البقرة الحلوب داخل الحظير الأمريكية
للمزيد من إعادة المحاولات الفاشلة لإسقاط الدولة السودانية طالما ان الأمريكان (ما دافعين حاجة)
وجلداً ما جلدك جُر فيه شنو يا جماعة
أيواااا الشوك.
التهديد بإرسال قوات أممية أفريقية للسودان هو (كلام) ليس إلا فذات الدولة التي ذكرها حاج التوم بأنها تدعم الجيش السوداني هي من تملك حق النقض (الفيتو) ضد أي تدخل أمريكي غربي ينتقص من سيادة السودان ومعاها (خالتنا) الصين
وهذا يؤكد أن السودان
(ماش صاح) بالإتجاه شرقاً و إن جاءت متأخرة
وأحد كبار السن كان
(لسانو فاكي)
فما أن يذكر له شخص ما وكان ضمن القائمة الصفراء لديه إلا ويقول لمحدثه …..
ها زول ها حرّم الزول ده *(زول ….. ساكت)*
والكلمة تحمل معنى مُوجع
فمن يترجمها للسيد توم بير ييلو! وله الأجر .
الثلاثاء ١٨/يونيو ٢٠٢٤م
#جيش_واحد_شعب_واحد

عن Admin2

شاهد أيضاً

*صبري محمد علي يكتب:* *سيتيهُون في الأرضِ أربعين سنة*

*صبري محمد علي يكتب:* *سيتيهُون في الأرضِ أربعين سنة* ظللت أحّتطب طيلة اليومين الماضيين علِّي …